ქართული თეატრისა და კინოს მსახიობს, ტრისტან სარალიძეს, რომელიც 69 წლის ასაკში გარდაიცვალა, მეგობრები და კოლეგები ემშვიდობებიან.
მსახიობი ტრისტან სარალიძე გარდაიცვალა
ტრისტან სარალიძეს ემშვიდობება რუსთაველის ეროვნული თეატრი, რომლის სცენაზეც მსახიობმა, 1980 წლიდან მოყოლებული, 44 წლის განმავლობაში უამრავი საინტერესო პერსონაჟი განასახიერა.
“უდიდეს მწუხარებას და ტკივილს განიცდის რუსთაველის ეროვნული თეატრი დღეს!
ჩვენი უძვირფასესი, რუსთაველის ეროვნული თეატრის მსახიობი, ტრისტან სარალიძე გარდაიცვალა!“ – აღნიშნულია რუსთაველის ეროვნული თეატრის მიერ გავრცელებულ ინფორმაციაში.
ტრისტან სარალიძეს სიყვარულით იხსენებს რეჟისორი სანდრო ელოშვილი და მის შესახებ სოციალურ ქსელში ემოციურ სტატუსს აქვეყნებს:
“ტრისტან სარალიძე გარდაიცვალა…
ადამიანი, რომელიც მთელი ცხოვრება ცდილობდა მეორე ადამიანის გაცინებას… ამიტომაც დედამიწას კიდევ ერთი მიზეზი დააკლდა ღიმილისთვის…
არადა როგორი აუცილებელია ეს ნიჭი, ეს ცოდნა დღეს? როგორ გვჭირდება…
ბოლოს, ისე იყო, კლინიკაში გვითხრეს, სახლში წაიყვანეთო… უკვე სახლის კიბეებზე, შვილებს, გოგას და ლევანჩოს გახედა: ბიჭებო! თქვენს ქორწილში… ვერაფერსაც ვერ ვიზამო, გულით გაგვეცინა! ახლაც, რომ მახსენდება მეღიმება…
რა მაგარია, არა?! შენს მერე რომ ღიმილი რჩება…
შენს გარეშე ნაკლები მიზეზი როა გაღიმების…“ – წერს სანდრო ელოშვილი სოციალურ ქსელში.
“მშვიდობით ჩემო ტკბილო მეგობარო, ძალიან მატკინე გული, ძალიან! წავიდა ჩვენი ძმაკაცი – ტრისტოც! მიყვარხარ და მადლობა!“ – წერს მსახიობი ედმონდ მინაშვილი.
“კაი რა… ჩემო საყვარელო, ტრისტან…“ – წერს მსახიობი პაატა გულიაშვილი.
“გაფრინდა ანგელოზებთან ჩვენი უკეთილშობილესი ტრისტან სარალიძე.
ნეტავ იქ თეატრი არის? ეს რა გააკეთე, შე უხსენებელო სიკვდილო“, – წერს ტრისტან სარალიძის ოჯახის მეგობარი ელისო პაჭკორია.
ტრისტან სარალიძის შესახებ წერს მსახიობი ქეთი ხიტირიც:
“ტრისტან სარალიძე არა მარტო კარგი მსახიობი, კარგი ადამინი! მშვიდობით, მადლობა“.
ცნობისათვის, ტრისტან სარალიძე იყო რუსთავის თეატრის მსახიობი, მონაწილეობდა თავისუფალი თეატრის სპექტაკლში, 1980 წლიდან კი იყო რუსთაველის ეროვნული თეატრის მსახიობი, სადაც 20-ზე მეტ სპექტაკლში განასახიერა საინტერესო გმირი.
მონაწილეობს თემურ ბაბლუანის 1980 წელს გადაღებულ ფილმში „ბეღურების გადაფრენა“, გამორჩეული კინოგმირი კი ასევე 1980 წელს, გიორგი შენგელიას მუსიკალურ კომედიაში შექმნა – მეველე „გივილო“ დღემდე, მრავალი თაობის მაყურებლის საყვარელი პერსონაჟია.
რადიოჰოლდინგი „ფორტუნა“ მწუხარებას გამოთქვამს ტრისტან სარალიძის გარდაცვალების გამო და თანაუგრძნობს მის ოჯახის წევრებსა და ახლობლებს.